Ito ang pinatunayan ng isang 3^rd Year accountancy student ng Polytechnic Unversity of the Philippines na si Kelly, matapos niyang gawin na isang malaking love letter ang North Wing ng gusali maipahayag lamang ang kanyang paghingi ng tawad para sa kanyang kasintahan na si Mickey. Ngunit ano ngaba ang puno’t dulo ng lahat ng ito?

 

Ika-22 ng Setyembre taong 2011 mula nang maging magkasintahan sina Kelly Boy at Mickey. Naging masaya ang kanilang pagsasama ngunit nagsimulang masira ang lahat ng ito matapos ipakilala ni Mickey ang kanyang matalik na kaibigan kay Kelly Boy. Palihim na kinuha ni Kelly Boy ang cellphone number ng kaibigan ng kasintahan upang diumano ay maipakilala ito sa isa niya ring kaibigan. Ngunit talagang naging mapanukso ang tadhana kay Kelly. ‘Di inaasahang umalis ang kanyang kaibigan at sa halip ay siya na lamang ang nakipagtext sa matalik na kaibigan ni Mickey. Lumipas ang maraming araw at tuluyang nahulog ang loob niya rito. Ngunit hindi natiis ng kanyang konsensya ang kasalanang kanyang ginawa kung kaya’t ipinagtapat niya ito kay Mickey. Sa kasamaang palad, nagdulot ito ng kanilang paghihiwalay. At dito na nagsimula ang lahat.

​

Naging usap-usapan sa iba’t ibang social networking sites ang kanilang kwento. Kumalat ang larawan ng higanteng love letter ni Kelly sa facebook at twitter hanggang sa maipalabas ito sa isang programa sa telebisyon, ang “Kapuso Mo, Jessica Soho”. At mula rito ay naisip ni Kelly na gumawa ulit ng isang bagay na kung saan ay mas lalaki ang pag-asa na patawarin siya ng pinakamamahal na kasintahan.  Kinausap niya ang isang grupo ng mga mananayaw sa kanilang paaralan upang handugan ng isang sayaw si Mickey.  Naging isa rin sa kanyang mga plano na humingi ng tawad ng personal kay Mickey. Hanggang sa dumating ang takdang araw para rito. Nagmistulang isang pelikula na tumatabo sa takilya ang pangyayaring ito. Humingi ng tawad si Kelly Boy kay Mickey sa freedom park ng paaralan habang may dalang bulaklak at mga tsokolate.